ಲ್ಯಹಣೆತ್ಚೊ ಭಾವು-ಬಾಲಕೃಷ್ಣ ಸಹಸ್ರಬುದ್ಧೆ ಮುಂಡಾಜೆ

ಲ್ಯಹಣೆತ್ಚೊ ಭಾವು
**************
ಬಾಳಾಲಾ ತೇಲ ಲಾವ್ನಿ ಮಾಕ್ಖುನಿ ಮಾತ್ಥೆಲಾ ಸುಟ್ಕೊ ಬಾಂಧೊನಿ ಪೊಟ್ಟಾಲಾ ದೇವ್ನಿ ನಿದ್ದೈಲಿಂತೆ ಆಯ್ಯೆಲಾಶಿ ಮಽಗ ದೋನ್ಹಿ ಘಂಟೆ ಫುರ್ಸತಿಚಿ. ಫುರ್ಸತಿ ಮ್ಹಳೆ ಕಾಮ ನಾಹಿ ಮ್ಹಣಿ ನೋಹೆ. ಬಾಳಾ ಸಮ ತ್ಸವವಸ್ಸ ನಾಹಿ ಮ್ಹಣಿ ಮಾತ್ರ. ಅಥವಾ ತ್ಯಾಚಿ ಸ್ವಂತ ಕಾಮ್ಮ ಕರ್ನಿ ಘೇವೆಲಾ ಟಿಂಭ ಫುರ್ಸತಿ ಮಿಳತ್ಸೆ ಮ್ಹಣಿ ಮ್ಹಣೊಯೇರ. ಪಣ ಆಯ್ಯೆಶಿ ಮ್ಹಣಿ ಜಾಲೆಲ್ಯಾಲಾ ಏಕು ಡೋಳೊ ಅಥವಾ ಸುಪ್ತ ಪ್ರಜ್ಞಾ ಬಾಳಾ ಸಮಂಚಿ ತ್ಸಸೆ ಮ್ಹಣವೆತ್ಚಯಿ ಫಟಿ ನೋಹೆ. ಮಾಜ್ಜೆರ-ಸೂಣೆಂತ್ಚೆ ಶಬ್ದಾಂಧಾ, ಕೋಣ್ಹಿತರಿ ಮೊಟ್ಯಾ ಬೊಲ್ಯೆಲತೆ, ಗಾಯಿ ಹಾಂಬಾಯ್ಲಿತೆ, ಮುರ್ಕುಟ್ಯೊ ತ್ಚಾವಿಂಡ್ಲ್ಯೊತೆ, ಧಾಕ್ಕುಟೆಲಾ ಶೀತ ಜಾಲತೆ.. ಅಸನಿ ಮಸ್ತ ವಿಷಯೆ ಧಾಕ್ಕುಟೆಚಿ ನೀದ ಪಾಡ ಕರ್ತ್ಸೆ. ತೆಢ್ಲಾ ಧಾಕ್ಕುಟ ಬ್ಯಹೊನಿ ಉಟ್ಠಿತಾಂಧಾ ಆಯ್ಯೆಶಿ ಜಾಲೆಲಿ ಕೇ ತ್ಸಲಿತರಿ ಧಾವತಿ ಯೇವೆತ್ಚೆ ಇತ್ಲೆ ದೂರಿಂತುಚಿ ತ್ಸವೆಚಿ ಯೇತ್ಸೆ. ಮ್ಹಳೆ ಶರೀರ ದೋನ್ಹಿ ತರಿ ಜೀವು ಎಕ್ಕುಚಿ ಮ್ಹಣಸ್ಸ ತ್ಸವೆತ್ಚೆ ಹೇ ಸಂಬಂಧಾಲಾ ಕೋಣ್ತಿ ಉದಾಹರಣಯಿ ದೇವೆಲಾ ಹನ್ನಾಹಿ. ತಸಂಚಿ ಪಾಹಾಂತಾಂಠಿ ಘರ್ಚಿ ಮಸ್ತ ಕಾಮ್ಮ ಕರ್ನಿ ಆಯ್ಯೆಶಿ ಭಾಗ್ಗಲಿತರಿ ಧಾಕ್ಕುಟೆತ್ಚ ಕಾಮ ಕರ್ನಿ ಭಾಗ್ಗಲೆಲಿ ಆಯ್ಯೆಶಿ ಪ್ರಪಂಚಾಂತು ಕೇಯಿ ಮಿಳೆನಾಹಿ.

ಆಯ್ಯೆಶಿ ಹಯಿವೆಚಿ ಮ್ಹಳೆ ತೊ ದೇವಾತ್ಚೊ ಆಶೀರ್ವಾದು ಅಥವಾ ಪೂರ್ವ ಜನ್ಮಾತ್ಚ ಪುಣ್ಯ ಮ್ಹಣಿ ಮ್ಹಣೊಯೇರ. ಎಕ್ಕಾ ತ್ಚೇಡಿತ್ಚ ಜೀವನ ಪರಿಪೂರ್ಣ ಹಯಿವವತೆ ತ್ಯಾಲಾ ಮಾತೃತ್ವ ಪ್ರಾಪ್ತಿ ಹಯಿವವ. ತೇ ಮಾತೃತ್ವಾಚಿ ಜವಾಬ್ದಾರಿ ಕೋಣ್ತಿ ಆಯ್ಯೆಶಿ ಸಸೂತ್ರ ಹವ್ನಿ ನಿರ್ವಹಣಾ ಕರ್ತ್ಸೆ ಪಳಾ ತೇ ಆಯ್ಯೆಲಾಶಿ ಪುಣ್ಯ ವಿನಾಹಾ ಪಾಪ ಲೇಪು ಕಯ್ಲಾಯಿ ಲಾಗ್ಗೆನಾಹಿ. ಮ್ಹಣ್ಣೀಚಿ ಜ್ಞಾನಿಯಿ ಮ್ಹಳ್ಳಿತ್ಸೆ. ನವರೆನಶಿ ಕೆಲ್ಲೆಲೆ ಪಾಪಾಲಾ ಪೂರ್ಣ ಜವಾಬ್ದಾರು ನವರೊಶಿಚಿ. ಪಣ ತೇಳಿನ ಸಂಪಾದನ ಕೆಲ್ಲೆಲೆ ಪುಣ್ಯಾಂತು ಅರ್ಧೊ ಭಾಗು ಬಾಯ್ಯಾಕಾಲಾ ಮಿಳತ್ಸೆಖೆ. ತಸಂಚಿ ಬಾಯ್ಯಾಕಾನ ಪಾಪ ಸಂಪಾದನ ಕೆಲ್ಲಂತೆ ತೇಂತು ಅರ್ಧೊ ವಾಂಟೊ ನವರೆಲಾಶಿ. ಪಣ ಬಾಯ್ಯಾಕಾನ ಸಂಪಾದನ ಕೆಲ್ಲೆಲೆ ಪುಣ್ಯಾಂತು ನವರೆಲಾಶಿ ತಿಲಾಂಶು ವಾಂಟೊಯಿ ಮಿಳೆನಾಹಿಖೆ. ಮ್ಹಳೆ ಬಾಯ್ಯಾಕೊ ಮ್ಹಣವೆಚಿ ತ್ಯಾತ್ಚೆ ಸಂಸಾರಾ ಸಾಟ್ಠಿ ಪೂರ್ತಿ ಜೀವನ ಸಮರ್ಪಣ ಕರವೆತ್ಚೆವೆಲ್ಯ ತ್ಯಾಲಾ ಇತ್ಲಿ ರಿಯಾಯಿತಿ ಮ್ಹಣೊಯೇರ. ಕಿತಯಿ ತ್ಸೋತು ಏಕ್ಕಾ ಪುರುಷಾ ಪಕ್ಷಾ ಏಕಿ ಬಾಯ್ಯಾಕೊ ಪ್ರಕೃತಿಲಾ ಕೆತ್ತಿ ಲಾಗ್ಗಿ ತ್ಸಸೆ ಮ್ಹಣಿ ಆಮ್ಧಾ ಕಳತ್ಸೆ. ಅಥವಾ ಬಾಯ್ಯಾಕೊ ಕಾಯಿಂತರಿ ತಪ್ಪು ಕರ್ತ್ಸೆತೆ ತೇಂತು ಪುರುಷಾನ ತೇಚಿ ಜವಾಬ್ದಾರಿ ಸಮಾನ ನಿರ್ವಹಣ ಕರಿನಾಹಿಸ್ಸಲೆಲಯಿ ಕಾರಣ ಹಂತ್ಸೆ ಮ್ಹಣಿ ವಡ್ಲಾಯಿ ಮ್ಹಣವೆತ್ಚ ಫಟಿ ನೋಹೆ ಮ್ಹಣಿಯಿ ಸಾವ್ಡತ್ಸೆ. ಕಿತಯಿ ತ್ಸೋತು ಏಕ ಧಾಕ್ಕುಟ ಪ್ರಪಂಚಾಂತು ತೇತ್ಚ ಅಸ್ತಿತ್ವ ದಾಕ್ಖವ್ವವಂತೆ ಆಯ್ಯೆಶಿ ಮ್ಹಣವೆತ್ಚೊ ಸಂಬಂಧುಚಿ ಕಾರಣ ಮ್ಹಣವೆತ್ಚಯಿ ಸತ್ಯಚಿ.

ಪಾಹಾಂತಾ ಧಾಕ್ಕುಟ ನಿದ್ದಾಂಠಿ ಉಟ್ಠಿತಕ್ಷಣಿ ರಾತ್ತಿ ನಿದ್ದವೇಸ್ತವೆರಿ ಆಯ್ಯೆತ್ಚೊಶಿ ಅಧಿಕಾಂಶು ವೇಳು ಧಾಕ್ಕುಟೆಲಾ ಮ್ಹಣಿಚಿ ವಿನಿಯೋಗು ಹಯಿವೆತ್ಚೊ. ರಡೊಲಾಗ್ಲತೆ ನಿವಾತ್ವವ್ವೆತ್ಚ ಕಸ ಮೊಟ್ಟ ಕಾಮಕಾ ತಸಂಚಿ ಆಂಗ ಧೊವ್ವವ್ವೆತ್ಚಯಿ ಲಾನ್ಹ ಕಾಮ ನೋಹೆ. ವರ್ಖಾ ಆಂತ್ಲಿಲಾ ಧಾಕ್ಕುಟೆಲಾ ಸಮಾಧಾನ ಕರವೆತ್ಚ ಮ್ಹಳೆ ಶಿಖ್ಯೆಲೆಲ್ಯೊ ಪೂರಾ ವಿದ್ಯಾಯಿ ಉಪಯೋಗು ಕರವೆಚ್ಯೊ ಯೇತ್ಸತಿ. ಕಿಲ್ಹಾ ಮ್ಹಳೆ ಏಕು ದ್ಯೋಸು ಜಾಲೆಲ ಸಮಾಧಾನ ದುಸ್ರೆ ದಿಸ್ಸ ಹಂತ್ಸೆ ಮ್ಹಣಿ ನಾಹಿ. ಏಕು ದ್ಯೋಸು ಕೆಲ್ಲೆಲೊ ಹಟು, ಲೂಟಿ ದುಸ್ರೆ ದಿಸ್ಸಾಲಾ ವಿಸ್ರತ್ಸೆ. ಏಕು ದ್ಯೋಸು ಲಾಗ್ಲೆಲಿ ಭೂಖ ಎರಾ ದಿಸ್ಸಾಯಿ ತಶೀಚಿ ತ್ಸಸೆ ಮ್ಹಣಿ ನಾಹಿ. ಆದ್ಲಾ ದಿಸ್ಸ ನಿದ್ದವ್ಲೆಲೆ ಇತ್ಲೊಚಿ ವೇಳು ಎರಾದಿಸ್ಸಾಯಿ ನಿದ್ದವ್ಸೆ ಮ್ಹಣಿ ನಾಹಿ… ಅಸ ಮಸ್ತ ವಿಷಯೆಂತು ಆಯ್ಯೆಶಿ ಮ್ಹಣವೆತ್ಚೊ ಜೀವು ಸದಾ ಜಾಗೃತಾವಸ್ಥೆಂತುಚಿ ತ್ಸವವೊ. ತೇ ಮಧ್ಯ ಕೋಣ್ತರಿ ಪಾಹೊಣಿ ಯೇವೆಚಿ, ಕಾಮ್ಮಾತ್ಚೆಂಧಾ ರಾಂಧಿ ವಾಡಿ, ಮೊಟ್ಟಿ ಧಾಕ್ಕುಟಿ ತ್ಸಲಿತೆ ತೆಂಧಾ ಸ್ಕೂಲಾಲಾ ಧಾಡವೆಚಿ ತಯಾರಿ, ಗೋರ್ವಾಂಧಾ ಖಾಣ ಪಾಣಿ, ಸೂಣೆ ಮಾಜ್ಜೆರಾಂಚಿ ಪೊಟ್ಟಾಚಿ ಕಥಾ ಅಸ ತ್ಯಾತ್ಚೆ ಸ್ವಂತಾ ಸಾಟ್ಠಿ ಮ್ಹಣಿ ವಾಂತ್ಚವೆತ್ಚೆ ಪಕ್ಷಾಯಿ ಏಕಿ ಗೃಹಿಣಿ ಲೋಕಾ ಸಾಟ್ಠಿ ವಾಂತ್ಚವೆಚಿಚಿ ಅಧಿಕ ಮ್ಹಣೊಯೆರ. ತಸತೆ ತೇ ಗೃಹಿಣಿಲಾ ಕಿತ ಸೂಖ ಮ್ಹಳ್ಳತೆ ತ್ಯಾತ್ಚೆ ಸಂಸಾರಾ ಸಾಟ್ಠಿ ನಿತ್ಯಯಿ ತಾದಾತ್ಮ್ಯಾಂತು ತ್ಸವೆಚಂಚಿ. ಮ್ಹಣ್ಣೀಚಿ ಬಾಯ್ಯಾಕಾಂಧಾ ಜ್ಞಾನಿಯಿ ಮ್ಹಳ್ಳಿತ್ಸತಿ ಕ್ಷಮಯಾ ಧರಿತ್ರಿ ಮ್ಹಣಿ. ಹೀ ಭೂಯಿ ಮನುಷ್ಯಾನ ಕಿತೆ ಅಪಸವ್ಯಾತ್ಚೆ ಕಾರಭಾರ ಕೆಲ್ಲೆಂತರಿ ಕೋಣ್ಹಾಯ್ಕಾಲಾಯಿ ದ್ರೋಹು ಕರಿತ್ನಾಹಿ. ತಸಂಚಿ ಆವ್ಘೆಂಧಾಯಿ ಪೋಷಣ ಕರ್ತ್ಸೆ. ತೇಲಾ ಏಕಿ ಬಾಯ್ಯಾಕೊ ಜಾಲೆಲಿ ಕೋಣ್ಹಾಲಾಯಿ ದ್ರೋಹ ಚಿಂತನ ಕರ್ತಾನಾಹಿ ತ್ಸವೆತ್ಚಂಚಿ ಕಾರಣ. ಆಮ್ಹಿ ಏಕಿ ಬಾಯ್ಯಾಕಾಲಾ ಸಂಪೂರ್ಣ ಆನಂದು ಅಥವಾ ಸಂತೃಪ್ತಿ ಕೇಢ್ಲಾ ಹಯ್ವೆಚಿ ಮ್ಹಣಿ ವಿತ್ಚಾರ್ಲತೆ ಎಕ್ಕಕ್ಲೊ ಎಕ್ಕೆಕ ಮ್ಹಣ್ತೀರ. ಪಣ ಕೆತ್ತಿ ಕಾಮ್ಮ ಕರ್ನಿ ಭಾಗ್ಗೊತು, ಕಿತ ದುರ್ಬಳ್ಪಣಯಿ ತ್ಸೋತು, ಕಸಲ ಅನಾರೋಗ್ಯ ತ್ಸೋತು ಎಕ್ಕಾ ಆಯ್ಯೆಲಾಶಿ ತ್ಯಾತ್ಚೆ ಜೀವನಾತ್ಚೊ ಸಾರ್ಥಕು ಕ್ಷಣು ಮ್ಹಳೆ ಮಾಕ್ಖುನಿ ನಿದ್ದೈಲೆಲ ಧಾಕ್ಕುಟ ಮಾತ್ಥೆಲಾಕ ಡೊಯ್ಯಾಲಾಕಾ ಬಾಂಧ್ಯೆಲೆಲೊ ಮುಂಡಾಸಾ ಸಮೇತ ನಿದ್ದಾಂಠಿ ಉಟ್ಠುನಿ ಬಾಹೇರು ಹಸತ ಹಸತ ಯೇವೆತ್ಚೊ ಕ್ಷಣುಚಿ ಮ್ಹಳ್ಳತೆ ಉತ್ಪ್ರೇಕ್ಷಾ ನೋಹೆ. ತಸಲೆ ಎಕ್ಕಾ ಕ್ಷಣಾಲಾ ಸಾಕ್ಷಿ ಜಾಲೆಲ ಹೇ ಭಾವ ಚಿತ್ರಾಲಾ ಮಾಜ್ಹೆ ಮನಾಚಿ ಬೊಲ್ಲಣಿ…
*******************************
ಬಾಲಕೃಷ್ಣ ಸಹಸ್ರಬುದ್ಧೆ ಮುಂಡಾಜೆ