ದಾಂಡಿ ಪುರಾಣ – ಬಾಲಕೃಷ್ಣ ಸಹಸ್ರಬುದ್ಧೆ ಮುಂಡಾಜೆ

************
ನಿರ್ಮಲಾತ್ಚೊ ಸಂಸಾರು ಮ್ಹಳೆ ಎಕ್ಕಾ ಕಾಳಾಂತು ಭರ್ಲೆಲೊ ಸಂಸಾರು. ನವರೊಶಿ, ತ್ಯೋಶಿ ಮಾಮ್ಮಶಿ, ಮೊಟ್ಟೆ ಭಾವಶಿ, ಧಾಕ್ಕುಟಿ, ಸೂಣಿ, ಗೋರ್ವ, ಮಾಜ್ಜೆರ.. ಅಸನಿ ಪ್ರತಿ ಏಕ್ಕಾ ವಿಷಯೆಂತುಯಿ ನಿರ್ಮಲಾ ಸಂತೃಪ್ತ ಭಾವಾಂತುಚಿ ತ್ಸವೆತ್ಚೆ ಎವ್ಡೊ. ತಸಂಚಿ ನಿರ್ಮಲಾತ್ಚ ಗೃಹಕೃತ್ಯಯಿ ಭಾರಿ ಶಿಸ್ತಾಂತುಚಿ ತ್ಸಸಲ. ಆಂತುಘರಾಂಠಿ ಧರ್ಲೆಲ ವಾಡ್ಯಾಚಿ ಕಾಮ್ಮವೆರಿ ತ್ಯಾತ್ಚೆ ಕಾಮ್ಮಾಂತು ಹಂತು ತ್ಯಾತ್ಚೆ ವಿಚಾರಾಂತು ಹಂತು ತ್ಯಾತ್ಚೊಚಿ ಜಾಲೆಲೊ ಶಿಸ್ತು ನಿಯಮು ತ್ಸಸಲೊ. ತೆವೆಲ್ಯ ಕೋಣ್ತೆ ಘರಾಂತುಯಿ ಬೇತಾತ್ಚೊ ವಿಷಯೊ ಯೆಂತಾ ಠೊಸ್ಸರೆಂಡಾತ್ಚೆ ನಿರ್ಮಲಾತ್ಚೊ ಬೇತು ಮ್ಹಣಿ ಆವ್ಘೆಂತ್ಚೆ ತೊಂಡಾಂತ್ಲ್ಯಯಿ ಯೇತ್ಸಲ. ತಸಂಚಿ ತ್ಯಾಳಿನ ಚಿರ್ಕುಟ ಹೋಳ್ನಿ ನಿರಾವ್ವೆತ್ಚೆಂತುಯಿ ಭಾರಿ ಬೇತು ತ್ಸೇ. ಕಸೊ ಮ್ಹಳೆ ಘರಾ ಸಮೂರ್ಠಿ ಮೊಟ್ಟ ಆಂಗಣ ತ್ಸಲೆಲೆವೆಲ್ಯ ಆಂಗಣೆತ್ಚೆ ತಡಿಂಧಾ ವೆತ್ತಾಚ್ಯೊ ದಾಂಡ್ಯೊ ಮಸ್ತ ಕರ್ನಿ ಠೇಯ್ಲ್ಯೊನ್ಸಲ್ಯೊನ್. ಪಣ ತೇ ದಾಂಡ್ಯಾಂತುಯಿ ಏಕು ಶಿಸ್ತು ತ್ಸಲೊ. ಏಕಿ ದಾಂಡಿ ತ್ಯೋಶಿ ಮಾಮ್ಮಾಂಧಾಶಿ ತೆ ಅಜುನೇಕಿ ಮೊಟ್ಟೆ ಭಾವಾಂಧಾಶಿ. ಏಕಿ ದಾಂಡಿ ಧಾಕ್ಕುಟೆಂಧಾ ತೆ ಅಜುನೇಕಿ ನಿರ್ಮಲಾಲಾನಿ ನವರೆಲಾಶಿ. ಕೋಣ್ಹಿತರಿ ಪಾಹೊಣಿ ಆಯ್ಲಿತೆ ತೆಂಧಾ ಮ್ಹಣಿಚಿ ವೆಗ್ಗಳೀಚಿ ದಾಂಡಿ. ಅಸ ಆವ್ಗಿ ತೆಂತ್ಚೆ ತೆಂತ್ಚೆ ದಾಂಡ್ಯಾಂತುಚಿ ಚಿರ್ಕುಟ ನಿರಾಯ್ತಾಂಧಾ ನಿರ್ಮಲಾಲಾ ಭಾರಿ ಖುಷಿ ಹಂತ್ಸಲಿ.

ಆಜಿ ನಿರ್ಮಲಾ ಎಕ್ಕಲಿ. ತ್ಯಾತ್ಚ ಜೀವನ ಕುರ್ಹಾಳಾಂತು ವೀಸ ವರ್ಖ ತೆ ಅರ್ಧ ಶತಮಾನಾ ಪಕ್ಷಾಯಿ ಅಧಿಕ ಸಾಸ್ಸುರೆಂತುಚಿ ವೆತ್ಚಲತ್ಸೆ. ಅಣ್ಭೈಸುನಿ ಆಯ್ಲೆಲಿ ವಾಟ ಲಾನ್ಹಿ ನೋಹೆ. ತೆವೆಲ್ಯ ಜೀವನಾತ್ಚ ಕಷ್ಟ ಸುಖಾತ್ಚೊ ಪೂರಾ ಅನುಭೊವು ನಿರ್ಮಲಾತ್ಚ ಮನ ಗುಂಡೆಚಾವಾರಿ ಹಯ್ವೆಲಾ ಕಾರಣ ಜಾಲತ್ಸೆ. ತ್ಯೋಶಿ ಮಾಮ್ಮಶಿ ವಯೋ ಸಹಜ ಹವ್ನಿ ಪುಢ್ಹ ಜಾಂತಾಂಧಾ ನಿರ್ಮಲಾತ್ಚೆ ಸಂಸಾರಾಚಿ ಅವನತಿ ಪ್ರಾರಂಭ ಜಾಲಿ ಮ್ಹಣೊಯೆರ. ತ್ಚೇಡಿ ಧಾಕ್ಕಟಿ ವರ್ಹಾಡ ಹವ್ನಿ ದೂರಿ ಜಾಲಿತೆ ಬೋಡ್ಯೊ ಶಿಕ್ಖೊನಿ ದೂರಿ ಜಾಲೊ. ತಸಂಚಿ ಥೊಡೆ ವರ್ಖಿಯಿ ಮೊಟ್ಟೆ ಭಾವ ಮ್ಹಣಿ ತ್ಸಲೆಲೊ ಜೀವುಯಿ ಕಾಳಾಂತು ಲೀನ ಹಂತಾಂಧಾ ನವರೊಶಿ ಬಾಯ್ಯಾಕೊ ಮಾತ್ರ ಘರಾಂತು ಉರ್ಲಿ. ತರಿ ನಿರ್ಮಲಾ ಬ್ಯಾಹಾಲಿ ನಾಹಿ. ಹೇ ಆವ್ಘ ಜಗತ್ಯಾಂತು ತ್ಸಲೆಲಂಚಿ ಮ್ಹಣಿ ಜಾಣೊನಿ ಘೇವೆತ್ಚೆ ಇತ್ಲಿ ತೀ ಜ್ಞಾನಿಯಿ ತ್ಸಲಿ ಮಾತ್ರ ನೋಹೆ ಜೀವನಾನುಭವುಯಿ ತ್ಸಲೊ. ಪಣ ನಿರ್ಮಲಾತ್ಚೆ ವೃದ್ಧಾಪ್ಯಾಲಾ ಆದ್ದಿಚಿ ನವರೊಶಿ ಪುಢ್ಹ ಜಾಂತಾಂಧಾ ಮಾತ್ರ ನಿರ್ಮಲಾ ಅನಾಥಿ ಜಾಲ ಮೇ ಮ್ಹಣಿ ಒಪ್ಪವೊನಿ ಘೆತ್ಲನ. ಪಣ ದೇವಾತ್ಚೆ ನಿರ್ಧಾರಾಲಾ ಆಮ್ಹಿ ಒಪ್ಪವೊನಿ ಘೇವವ ಹೊರತು ವೆಗ್ಗಳಿ ವಾಟಚಿ ನಾಹಿ ಮ್ಹಣವೆತ್ಚ ಸತ್ಯಯಿ ನಿರ್ಮಲಾಲಾ ಗೊಂತು ತ್ಸಲೆಲೆವೆಲ್ಯ ಥೊಡೆಚಿ ಕಾಳಾಂತು ತೀ ಯೋಗಿಂಚಾವಾರಿ ದಿಸ್ಸಾಂದ್ಯೋಸು ಜ್ಞಾನಿ ಹವ್ಲಾಗ್ಲಿ. ತ್ಯಾತ್ಚೆ ವೃದ್ಧಾಪ್ಯಾಂತು ಕಳೆವ್ನಿ ಘೆತ್ಲೆಲೆ ಪೂರಾ ಸಂಬಂಧಯಿ ಭಗವದ್ಗೀತಾಂತು ಸೊದ್ಧೀತಿ ತ್ಸತಾ ನಿರ್ಮಲಾ ಎಕ್ಕಾ ಹಂತಾಂತು ಕೃಷ್ಣಾಲಾ ಪೂರ್ಣ ಶರಣಾಗತಿ ಜಾಲೆಲಿ ಅಂತು ಫಟಿ ನೋಹೆ.

ಯುಗಾದಿಲಾ ದೊಗ್ಘಿ ಧೂವಾಂತ್ಸಮ ಜಾವಯ್ಶಿ, ಧಾಕ್ಕುಟಿ, ಬೋಡ್ಯೊ ಯೇವ್ನಿ ಚಾರಿ ದ್ಯಸ ತ್ಸಲೆಲೆವರ್ಠಿ ನಿರ್ಮಲಾಲಾ ಮಾಗ್ಗಾಂತ್ಚೆ ಭರ್ಲೆಲೆ ಘರಣೆತ್ಚೊ ಆಠ್ಠೊವು ಆಯ್ಲೆಲೊ ಸಹಜಚಿ. ತೇ ಚಾರಿ ದ್ಯಸ ಜಾಲೆ ಉಪ್ರಾಂತ ಆಪ್ಪಣ ದುಸ್ರೆನ ಎಕ್ಕಲೀಚಿ ಮ್ಹಣಿ ನಿರ್ಮಲಾಲಾ ಗೊಂತು ತ್ಸಲೆಲೆವೆಲ್ಯ ಧಾಕ್ಕುಟಿ ನಾತ್ತರ್ವಾಂಧಾ ಭಾರಿ ಲಾಗ್ಗೌನಿ ಘೇನ್ನತ್ಲಿ. ಪದ್ಮಪತ್ರಮಿವಾಂಭಸಾ ಮ್ಹಣವೆತ್ಚೆವಾರಿಂಚಿ ತ್ಸಲಿ. ಅವ್ರಾತ್ಚ ಪಾಣಿ ಗೆಲ್ಲೆ ಉಪ್ರಾಂತ ಜ್ಹರೆತ್ಚ ಪಾಣಿ ಮಾತ್ರ ಉರವೆತ್ಚ ಮ್ಹಣಿಯಿ ನಿರ್ಮಲಾಲಾ ಗೊಂತು ತ್ಸಲ. ತಮಾಸೆಲಾ ಮ್ಹಣಿ ಧಾಕ್ಕುಟೆಂಧಾ ನಿರ್ಮಲಾ ಮ್ಹಣ್ಸಲಿ ‘ಪಳಾ ತುಮ್ಹಿ ಊದ್ಯಾ ಆವ್ಘಿ ಜಾತ್ಸಾ. ಪಣ ಹೋ ಆಠ್ಠೊವುಯಿ ಘೇವ್ನಿಚಿ ಜಾ. ನಾಹಿತೆ ತೋ ಮಾಜ್ಹೊ ಪ್ರಾಣು ಖಾತ್ಸೆ’ ಮ್ಹಣಿ ಹಸೊನಿ ಮ್ಹಳ್ಳಂತರಿ ಡೋಳೆಂತು ಭರ್ಲೆಲ ಪಾಣಿ ಹಸ್ಣೆತ್ಚೊ ಭಾವು ಕಿತೊ ಮ್ಹಣಿ ಸಾಂಘತ್ಸಲೊ. ತೇ ದಿಸ್ಸಯಿ ಬರೆ ಕಾಳಾ ಉಪ್ರಾಂತ ದಾಂಡ್ಯೊ ಭರಿ ಆವ್ಘೆಂಚಿ ಚಿರ್ಕುಟ ನಿರಾಯ್ಲೆಲಿ ಪಳಾವ್ನಿ ನಿರ್ಮಲಾಲಾ ಆನಂದು ಜಾಲೊತ್ಸಲೊ. ಪಾಹಾಂತಾಂಠಿ ಕಾಮ್ಮ ಕರ್ನಿ ನಿರ್ಮಲಾ ಭಾಗ್ಗೊನಿ ದುಪ್ಪಾರಿತ್ಚ ಜೇವಣ ಕರ್ನಿ ನಿದ್ದವ್ಲಿತ್ಸಲಿ. ಇತ್ಲಕಾಂಧಾ ಬಾಹೆರು ಸೂಣ ಭೊಂಕ್ಯೆಲ ಮ್ಹಣಿ ಉಠ್ಠುನಿ ಗೆಲ್ಲಿತೆ ಮಾಡ್ಡಾಂವರ್ಠಿ ಶಾಳಿ ಪ್ಯೇವೆಲಾ ಮ್ಹಣಿ ಮಾಂಕಡ ಆಯ್ಲೆತ್ಸಲೆ. ಪಣ ನಿರ್ಮಲಾಲಾ ಮಾಂಕಡಾಂವರಿ ರಾಗು ಯೇನ್ನತ್ಲೊ. ಮಾಜ್ಹೆ ಜೀವನಾ ವಿನಹ ಕೊಣ್ಹಾಲಾಯಿ ಹೀ ವಾಡ್ಯಾಚಿ ಉತ್ಪತ್ತಿ ನಾಕಾ ಜಾಲೆಲೆವೆಲ್ಯ ಮಾಂಕಡ ತರಿ ಖಾಂತು ಮ್ಹಣಿ ಸಂತೃಪ್ತಿಂತು ನಿವಾತಿಚಿ ತ್ಸಸಲಿ. ಮಗ ದುಸ್ರೆನ ನಿದ್ದವ್ವೆಲಾ ಆಳೊಸು ಯೇವ್ನಿ ಆಂಗಣೆಂತು ನಿರಾಯ್ಲೆಲಿ ಚಿರ್ಕುಟ ಪಳಾವಿತಿ ತ್ಚಾಹೊಡ್ಯಾಂತು ನಿವಾತಿ ಬೆಸ್ಸತಾ ಮಾಗ್ಗಂತ್ಚೆ ಆಠ್ಠವ ನಿರ್ಮಲಾತ್ಚೆ ಸ್ಮೃತಿಂತು ಭೋವೊಲಾಗ್ಲೆ.

“ಎಕ್ಕಾ ಕಾಳಾಂತು ದಾಂಡ್ಯೊ ಭರಿ ಚಿರ್ಕುಟ ನಿರಾಯ್ಲಿತರಿ ಜಾಗೊ ಪುರತ್ನತ್ಲೊ. ತೆಢ್ಲಾ ಉರ್ಲೆಲಿ ಚಿರ್ಕುಟ ಘರಾ ಸಮೂರಿ ತ್ಸವೆತ್ಚೆ ಕಾತ್ತಳಾವರಿ ನಿರಾಯ್ಸಲ. ಮೊಟ್ಟೊ ಕಾತ್ತೊಳು ಆಂಧಾ ವರದಾನಚಿ ಜಾಲೊತ್ಸಲೊ. ಕೆತ್ತಿ ಘಣಿ ಮಾಂದೆರ್ಯೊ ತರಿ ಎಕ್ಕಾ ಘಂಟೆ ಮಧ್ಯ ಸುಕ್ಖತ್ಸಲ್ಯೊ. ಮಾತ್ರ ನೋಹೆ ನಿಬ್ಬರಾತ್ಚೊ ಅನಿಕ ಕಾತ್ತಳಾತ್ಚೊ ಪರ್ಹ್ಮೊಳು ಒಟ್ಟು ಹವ್ನಿ ಮನಾಂತು ಮೋಹಕ ಭಾವು ಉತ್ಪತ್ತಿ ಹಂತ್ಸಲೊ. ತೋ ಕಾತ್ತೊಳು ಆಮ್ಧಾ ಚಿರ್ಕುಟಾಂಧಾ ಮಾತ್ರ ನೋಹೆ ಪಾಪ್ಪಡ, ಸಾಟ, ಕುಮಾಂತ್ರ, ವಡ್ಯೊ, ವಡೆಖಂಡ ಸುಕ್ಖವ್ವೆಲಾ ಮಸ್ತ ಉಪಯೋಗು ಹಂತ್ಸಲೊ. ಮಾತ್ರ ನೋಹೆ ಘರಾಲಾ ಡಾವೆಲಾ ವಾಡಿ ಉಜ್ವೆಲಾ ಡೊಗ್ಗೊರಾತ್ಚೆ ಮಧ್ಯ ವಾರೊ ವೇಳತ್ಸತಾ ವಿಳ್ಚಾ ಬೆಸ್ಸೊನಿ ಖಬ್ರಿ ಕರವೆ ಹೇ ಕಾತ್ತಳಾ ಉಪ್ರಾಂತ ಪ್ರಶಸ್ತ ಜಾಗೊ ಬಹುಷ ಪ್ರಪಂಚಾಂತುಚಿ ನತ್ಸೇರ ಮ್ಹಣಿ ಮಾಲಾ ಆಜ್ಜಿಯಿ ಸಾವ್ಡತ್ಸೆ… ಮಾಮ ಪುಢ್ಹ ಜಾಂತಕ್ಷಣಿ ದಾಂಡಿ ಟಿಂಭ ಹರ್ವಾಳಿ ಹವ್ಲಾಗ್ಲಿ. ತಸಂಚಿ ತ್ಯೊ ಪುಢ್ಹ ಜಾಂತಾಂಧಾ ತೀ ದಾಂಡಿಚಿ ಖಾಲಿ ಜಾಲಿ. ತೆಢ್ಲಾ ಮಾಲಾ ಸಮ್ಜಲ ನಾಹಿ. ಪುಢ್ಹ ಧಾಕ್ಕುಟಿ ವರ್ಹಾಡ ಹಂತಾ, ಬೋಡ್ಯೊ ಕಾಮ್ಮಾಲಾ ಜಾಂತಾ ಹ್ಯೋ ದಾಂಡ್ಯೊ ಚಿರ್ಕುಟ ನತ್ಲೆಲೆ ನಾಗ್ಗುಡೆ ಧಾಕ್ಕುಟೆಂಚಾವಾರಿ ಪಳಾವ್ವೆಲಾ ಖುಷಿ ಹಂತ್ಸಲ. ಪಣ ಮಾಜ್ಹಿ ಮಾತ್ರ ದಾಂಡಿ ಉರತಾಂಧಾ ಅಥವಾ ಉರ್ಲೆಲ್ಯೊ ದಾಂಡ್ಯೊ ಖಾಲಿ ಹಂತಾಂಧಾ ಮಾಜ್ಹ ಸರ್ವೇಶ್ವಯಿ ಖಾಲಿ ಮ್ಹಣಿಚಿ ಸಾವ್ಡಸ್ಸಂಚಿ ಉರ್ಲೆಲಿ ದಾಂಡಿ ಕಯಿ ಖಾಲಿ ಹಯ್ವೆಚಿಕಾ ಮ್ಹಣಿಯಿ ಸಾವ್ಡೊಲಾಗ್ಲೆಲಯಿ ಫಟಿ ನೋಹೆ. ತೆಢ್ಲಾ ಘರಾಂತು ತೆಂಚಿ ತೆಂಚಿ ಚಿರ್ಕುಟ ತೇಯಿ ತೇಯಿಂಚಿ ಹೋಳವೆಚಿತರಿ ಚಿರ್ಕುಟ ಮಟ್ಪುನಿ ಠೆವ್ವೆಚಿ ಮೇಚಿ. ಪ್ರತಿ ಎಕ್ಕಲೆತ್ಚೆ ಚಿರ್ಕುಟಾಂಧಾಯಿ ವಿಶಿಷ್ಟ ಪರ್ಹ್ಮೊಳು ತ್ಸಸಲೊ. ಧಾಕ್ಕುಟೆಂತ್ಚಿ ಚಿರ್ಕುಟಾಂಧಾ ಏಕು ಪರ್ಹ್ಮೊಳು ತೆ ತ್ಯೋ ಮಾಮ್ಮಾಂತ್ಚೆ ಚಿರ್ಕುಟಾಂತ್ಚೊ ಪರ್ಹ್ಮೊಳುಚಿ ವೆಗ್ಗಳೊ. ಪಣ ಹೆಂತ್ಚೆ ಚಿರ್ಕುಟಾಂಧಾ ಪರ್ಹ್ಮೊಳುಯಿ ನತ್ಲೊ ಘಾಣಿಯಿ ನತ್ಲಿ. ತೆಂತ್ಚೆ ಸ್ಥಿತಪ್ರಜ್ಞಾ ಸಾರ್ಖ. ಮಾಜ್ಹಿ ಚಿರ್ಕುಟ ಕೆತ್ತಿ ಖಾತ್ತಿರ್ಡಿ ತರಿ ನಿಬ್ಬರಾಲಾ ಸುಕ್ಖತಾಂಧಾ ಆನಂದು ಹಂತ್ಸಲೊ. ನಿತ್ಯಯಿ ಮೇ ಹೇಲಾ ಸಾಕ್ಷಿ ಜಾಲೆಲೆವೆಲ್ಯ ಕಾಳಖಾಂತುಯಿ ನಿಸ್ತೆ ಪರ್ಹ್ಮಳಾವರ್ಠಿ ಹೇ ಚಿರ್ಕುಟ ಅಮ್ಕೆತ್ಚ ಮ್ಹಣಿ ಸಾಂಘವೆಲಾ ಹಂತ್ಸಲ… ಧಾಕ್ಕುಟಿ ಉಠ್ಠವೆ ಜಾಲಿ. ಊದ್ಯಾ ಪಾಶ್ಠಿ ಘರಯಿ ಖಾಲಿ, ದಾಂಡ್ಯೊಯಿ ಖಾಲಿ. ಲೊಕ್ಕರಿ ಚಿರ್ಕುಟ ತರಿ ಮಟ್ಪುನಿ ಠೇವ್ಯಾ” ಮ್ಹಣಿ ನಿರ್ಮಲಾ ಶುಷ್ಕ ಭಾವಾಂತು ಎಕ್ಕಕಚೀ ಚಿರ್ಕುಟ ಮಟ್ಪುಲಾಗ್ಲಿ.
**************************
ಬಾಲಕೃಷ್ಣ ಸಹಸ್ರಬುದ್ಧೆ ಮುಂಡಾಜೆ